Ағымдағы жылдың 25 тамызында Семей қаласында өткен Тамыз конференциясының пленарлық отырысында Ы. Алтынсарин атындағы Ұлттық білім академиясының ғалымдары жаңа оқу жылындағы басымдықтар мен ерекшеліктерді таныстырып, педагогтерге әдістемелік қолдау көрсетті.

Алтынсарин академиясының «Педагогикалық квалиметрия» орталығының жетекші ғылыми қызметкері, п.ғ.к. Исатай Сағындықов «Оқу-тәрбие жұмысының нәтижесін бағалау және оны басқару тәсілдері» тақырыбында баяндама жасап, бағалау – тек білім нәтижесін анықтау құралы ғана емес, оқушының жеке даму траекториясын бақылаудың маңызды механизмі екенін түсіндірді. Академияның Орта білім мазмұны институты зертханасының меңгерушісі Айнур Архыматаева 2025-2026 оқу жылында білім беру процесін ұйымдастырудың негізгі бағыттарына тоқталды. Тәрбие теориясы және әдістемесі орталығының аға ғылыми қызметкері Айжан Магауия «Адал азамат» біртұтас тәрбие бағдарламасы, оның нәтижелері мен жаңа оқу жылындағы басымдықтары тақырыбында баяндама жасады. Спикер А.Магауия республикалық тамыз конференциясында Мемлекет басшысы Қ. Тоқаев атап өткен негізгі маңызды мәселелерге байланысты «Адал азамат» біртұтас тәрбие бағдарламасын сапалы іске асыру үшін жаңа оқу жылында назар аудару керекті мәселелерді талдады.

Сонымен қатар, жиынға қатысушылар қазіргі орта білім беру саласындағы өзекті тақырыптар: академиялық адалдықты қамтамасыз ету, кәсіптік бағдар беру жұмыстарын күшейту, инклюзивті білім беруді дамыту, педагогтердің авторлық бағдарламаларын әзірлеу және бекіту, педагогтерді аттестаттау жүйесін жетілдіру мәселелерін кеңінен талқылады.