Павлодар облысы Білім беруді дамытудың инновациялық орталығы КММ ұйымдастырған Тамыз конференциясының «Ішкі және сыртқы бағалау мазмұнының ерекшеліктері» 7-секция аясында Ұлттық білім академиясының қызметкерлері BR21882300 «Ұлттық интеграцияланған бағалау жүйесінің тұжырымдамалық негіздері» (2023–2025 жж.) бағдарламалық-нысаналы қаржыландыру жобасы шеңберінде педагогтермен интерактивті-шеберлік сессиялар өткізді. Іссапардың негізгі мақсаты – эксперименттік мектептер тәжірибелері негізінде ішкі және сыртқы бағалауды интеграциялау тетіктерін талдау, интеграцияланған бағалау құралдарын жетілдіруге арналған деректер жинау және педагогикалық қауымдастықпен тікелей пікір алмасу.

Секция барысында ішкі бағалаудың сапаны арттырудағы рөлі және бастауыш білім беруде формативті бағалаудың тиімді тәсілдері талқыланса, келесі күні Педагогикалық жетістіктер шеберханасында эксперименттік мектеп мұғалімдері өз тәжірибелерімен бөлісіп, формативті бағалау, критерийлер мен дескрипторларды әзірлеу, функционалдық сауаттылыққа негізделген тапсырмалар үлгілерін ұсынды. Академия қызметкерлерінің үйлестіруімен оқу пәндері бойынша ішкі бағалау тапсырмаларын әзірлеу бойынша интерактивті-тәжірибелік жұмыс жүргізілді. Сонымен қатар жоба аясында әзірленіп жатқан Ұлттық интеграцияланған бағалау жүйесі моделі талқыланып, эксперименттік мектеп директорлары моделді өз білім ордаларында сынақтан өткізуге зор құлшыныс білдірді.

Жоба аясындағы Павлодардағы практикалық-шеберлік алаң ішкі бағалаудың сапаны арттырудағы рөлін нақтылап қана қоймай, бағалау жүйесін интеграциялаудың тиімді жолдарын белгіледі. Жиналған материалдар мен ұсыныстар халықаралық ғылыми алаңдарда ұсынылатын болады.