Алтынсарин академиясы мен Ақмола облысы білім басқармасы Қосшы қаласы мектеп-гимназиясында «Цифрлық технологиялар мен инновациялар: білім беру жүйесінің жаңа дәуірі» атты республикалық ғылыми-тәжірибелік семинар ұйымдастырды. 

Семинар жұмысына өңірлерден келген 400-ге жуық педагог офлайн форматта қатысты. Іс-шарада 60-тан астам педагог цифрлық шешімдерді сабақта тиімді қолдану жолдарын постер форматында таныстырса, 30-ға жуық креативті жоба «Цифрлық білім» көрмесінде ұсынылып, білім беру процесіне инновацияларды енгізудің жарқын үлгісін көрсетті. Интерактивті сессияның шеберлік сабақтарында педагогтер өздерінің озық тәжірибелерімен бөлісіп, жаңа идеяларды талдады. Семинар барысында ұстаздар шығармашылық алаңда белсенді жұмыс істеп, білім беру процесінде жасанды интеллект пен инновациялық платформаларды пайдалану, медиасауаттылық пен функционалдық сауаттылықты арттыру бағытында өзекті мәселелерді талқылады. 

Академия цифрлық білім беруді дамытуға арналған осындай диалог алаңын алдағы уақытта да ұйымдастыратын болады.